​شكون هي نفيسة القصار اللي خذات قيادة الهولدينغ الملكي “المدى” من بعد رحيل حسن الورياكلي؟

نفيسة القصار قراّت فـEPFL فـلوزان، وبدّات الخدمة ديالها فسويسرا فمجموعة “نستله” فمدينة فيفي كمهنّسة إطار فمديرية التنظيم. منين رجعات للمغرب فالتسعينات، التحقت بالبنك التجاري المغربي (BCM) اللي من بعد ولى “تجاري وفا بنك” من بعد الاندماج مع “وفا بنك”. تدرّجات فعدة مناصب فالبنك: ترأست قسم المجموعات والمقاولات الكبرى، وشاركات فإحداث “Attijari Finances Corp” أول بنك أعمال فالمغرب وولات مديرتو. كذلك تكلّفات بتأسيس مديرية التمويلات المهيكلة وقدّاتها لمدة ست سنوات، وخدمات كمرتب رئيسي فعمليات كبار فقطاعات ناشئة، وساهمات فإطلاق نشاط “Private Banking” فالمجموعة.

مع الورياكلي فمرحلة التحوّل
فـيونيو 2014، ومن بعد التجارب اللي راكمات، تعيّنات نفيسة القصار مديرة تنفيذية فالشركة الوطنية للاستثمار (SNI)، شهور قليلة قبل ما يوصل حسن الورياكلي لقيادة القابضة. رافقاتو فمسار التحوّل ديال القابضة اللي تبدّل سميتها لـ“المدى” فـ2018، وتحوّلات لنموذج ديال صندوق استثماري كيغطّي إفريقيا كاملة بهدف خلق قيمة مستدامة. وفـ2017 تعطا ليها تمثيل القابضة فمجلس إدارة “الخطوط الملكية المغربية”، ومن داك الوقت توسعات المهام ديالها بزاف: ولات عضوة فمجالس إدارة شركات بحال “مناجم”، “سوبريام”، “أوبتورغ”، وزيد عليها بزاف ديال الفروع الأخرى ديال المجموعة.

أول مرا على رأس مجموعة واسعة النفوذ
اليوم نفيسة القصار كتترأس “المدى”، مجموعة اللي كتشتغل فعدة قطاعات: المالية عبر “تجاري وفا بنك”، الصناعة عبر “مناجم”، الاتصالات عبر “إنوي”، الطاقات عبر “ناريفا”، والتوزيع عبر “أوبتورغ”. وبحسب البلاغ ديال المجموعة، هاد التعيين غادي يضمن التطوّر الحالي ديال “المدى”، ويقوّي منظومة الابتكار ديالها، ويساهم فالتقدّم الاقتصادي والاجتماعي ديال المغرب وعلى المستوى الدولي، وكلشي “فإطار الالتزام بالقيم والمبادئ اللي رسّموها المساهمين ديال المجموعة”.