جبل نظيف ثلاث مرات
ماشي باش يدير البوز. ماشي باش يدوّز فـ الأخبار. ولكن باش يوصل رسالة: الجبال ماشي بلاكار ديال الكتابة، الجبال فنّ ماخصناش نوسخوه.
خالد طلع بوحدو، بلا سبونصور، بلا فريق، غير هو و القصد ديالو.
كل مرة كيوصل فيها للقمة، كيتوقف باش يمسح واحد الطاغ مرسوم فالحجرة.
ثلاث مرات، ثلاث طوغات تمسحو، وثلاث قمم تعلات فصمت.
قالها بطريقة زوينة:
"مايمكنش نكتب على لوحة فنية، علاش نكتب على جبل؟"
التحدي تسما "3x Toubkal Challenge"، وغادي يخرج فـ فيلم وثائقي فيه التصاور، التعب، والخاطر. ولكن زيد عليهم حاجة: رسالة قوية كتقول بأن الطبيعة ماكتستاهلش الوسخ، كتستاهل الإحترام.
📲 تقدروا تشوفو التيزرات فـ إنستاغرام @abodrar_adventures
🟩 فالهامش: واش غادي نبقاو نوسخو الجبل حتى يولّي بلا روح؟
توبقال كيدوزو منو آلاف الناس كل عام. ولكن مع كترة الناس، كيزيد الوسخ، كيتخسر المسار، وكيولّيو الجبال كيشوفو غير فالدّمار.
المبادرة ديال أبودرار كترجع لينا الأمل: ممكن نكونو سياح بلا ما نقصّو من جمال الجبل، ممكن نعيشو المغامرة بلا ما نلوّثو.
المغرب خاصّو يعوّل على ناس بحالو، باش الجبال ديالنا تبقى نقية، وتبقى ديما كتربّي وتعلّم.